LI AVEULES
Faites nous bien, seingnor baron,
que Dieus li fius Marie
vous meche tous en sa maison
et en sa compaignie !
Veoir ne vous puis mie ;
pour moi vous voie Jesus Cris,
et tous chiaus mete en paradis
ki me feront aïe !
A ! mere Dieu, sainte Marie,
souveraine, quele eure est il ?
Je n'ot nului ; trop me tieng vill
que je n'ai au mains un garchon
qui me remenast en maison :
car, s'il ne savoit bien canter,
si saroit il dou pain rouver
et moi mener as grans osteus.
OR PAROLE LI GARÇONS
(À part)
E ! las, con je sui disiteus !
(Il aperçoit l'aveugle)
Il ne me faut plus nule rien.
(À l’aveugle)
Sire, vous n'alés mie bien :
vous querrés ja en cest celier.
OR PAROLE LI AVEULES
A ! mere Dieu, veuillié me aidier !
Ki es ce qui si bien m'avoie ?
OR PAROLE LI GARÇONS
Preudons, se Jhesus me doint joie,
çou est uns povres triquemers.
OR PAROLE LI AVEULES
Pour Dieu, je croi qu'il soit mout bers.
Viengne avant ! a lui veull parler.
OR PAROLE LI GARÇONS
Ves me chi.
LI AVEULES
Te veus tu louer ?
LI GARÇONS
Sire, a quoi seroi che faire ?
LI AVEULES
Pour mi pourmener sans meffaire
aval la cite de Tournay :
tu prieras, je canterai ;
s'arons assés argent et pain.
LI GARÇONS
He ! par la panche saint Gillain,
bien me cuidiés ore foubert ;
mais je vous di bien en apert
k'un escuçon le jour aray
de tant k'avocques vous iray,
et si n'en lairai nule cose.
LI AVEULES
Biaus dous amis, car ne me chose !
Coument t'apel'on ?
FIN DE L’EXTRAIT
______________________________________
Published by Les Éditions de Londres
© 2014 — Les Éditions de Londres
ISBN : 978-1-909782-73-0