Nos jeusnes parachevez l’hermite nous bailla une lettre adressante à un qu’il nommoit Albian Camar, maistre Aeditue de l’Isle sonnante, mais Panurge le saluant l’appela maistre Antitus. C’estoit un petit bon-homme vieux, chauve, à muzeau bien enluminé, & face cramoisie. Il nous fist tres bon recueil par la recommandation de l’hermite, entendant qu’avions jeusné comme a esté declaré. Apres avoir tres-bien repeu nous exposa les singularitez de l’Isle, affermant qu’elle avoit premierement esté habitee par les Siticines, mais par ordre de nature comme toutes choses varient, ils estoient devenus oiseaux.
Là j’eus pleine intelligence de ce qu’Atteius Capito, Pollux, Marcellus, A. Gellius, Athenaeus, Suidas, Ammonius, & autres avoyent escrit des Siticines & Sicinnistes & difficile, ne nous sembla croire les transformations de Nyctimene, Progne, Itys, Alcmene, Antigone, Tereus, & autres oiseaux. Peu aussi de doubte fismes des enfans Matrobrine convertis en Cignes, & des hommes de Pallene en Thrace, lesquels soubdain que par neuf fois se baignent au palude Tritonique, sont en oiseaux transformez.
FIN DE L’EXTRAIT
______________________________________
Published by Les Éditions de Londres
© 2015 — Les Éditions de Londres
ISBN : 978-1-910628-28-7