On moys de Iuin, au iour des festes Vestales : celluy propre on quel Brutus conquesta Hespaigne, et subiugua les Hespaignolz, on quel aussi Crassus l’avaricieux feut vaincu et deffaict par les Parthes, Pantagruel prenent congé du bon Gargantua son pere, icelluy bien priant (comme en l’Eglise primitive estoit louable coustume entre les saincts Christians) pour le prospere naviguaige de son filz, et toute sa compaignie, monta sus mer au port de Thalasse, accompaigné de Panurge, frere Ian des entommeures, Epistemon, Gymnaste, Eusthenes, Rhizotome, Carpalim, et aultres siens serviteurs et domesticques anciens : ensemble de Xénomane le grand voyageur et traverseur des voyes perilleuses, lequel certains iours par avant estoit arrivé au mandement de Panurge. Icelluy pour certaines et bonnes causes avoit à Gargantua laissé et signé en sa grande et universelle Hydrographie la routte qu’ilz tiendroient visitans l’oracle de la dive Bouteille Bacbuc.
Le nombre des navires feut tel que vous ay exposé on Tiers Livre, en conserve de Triremes, Ramberges, Gallions, et Liburnicques nombre pareil : bien equippées, bien calfatées, bien munies, avecques abondance de Pantagruelion. L’assemblée de tous officiers, truchemens, pilotz, capitaines, nauchiers, fadrins, hespailliers, et matelotz feut en la Thalamege. Ainsi estoit nommée la grande et maistresse nauf de Pantagruel : ayant en pouppe pour enseigne une grande et ample bouteille à moytié d’argent bien liz et polly : l’aultre moytié estoit d’or esmaillé de couleur incarnat. En quoy facile estoit iuger, que blanc et clairet estoient les couleurs des nobles voyagiers : et qu’ilz alloient pour avoir le mot de la Bouteille.
Sus la pouppe de la seconde estoit hault enlevée une lanterne antiquaire faicte industrieusement de pierre sphengitide et speculaire : denotant qu’ilz passeroient par Lanternoys.
La tierce pour divise avoit un beau et profond hanat de Porcelaine.
La quarte un potet d’or à deux anses, comme si feust une urne antique.
La quinte un brocq insigne de sperme d’Emeraulde.
La sizieme un Bourrabaquin monachal faict des quatre metaulx ensemble.
La septieme un entonnoir de Ebene tout requamé d’or à ouvraige de Tauchie.
La huictieme un guoubelet de Lierre bien precieux battu d’or à la Damasquine.
La neufieme une brinde de fin or obrizé.
La dizieme une breusse de odorant Aalloche (vous l’appellez boys d’Aloes) porfilée d’or de Cypre à ouvraige d’Azemine.
L’unzieme une portouoire d’or faicte à la Mosaicque.
La douzieme un barrault d’or terny couvert d’une vignette de grosses perles Indicques en ouvraige Topiaire.
De mode que personne n’estoit tant triste, fasché, rechigné, ou melancholicque feust, voyre y feust Heraclitus le pleurart, qui n’entrast en ioye nouvelle, et de bonne ratte ne soubrist, voyant ce noble convoy de navires en leurs devises : ne dist que les voyagiers estoient tous beuveurs gens de bien : et ne iugeast en prognostic asceuré, que le voyage tant de l’aller que du retour seroit en alaigresse et santé perfaict.
En la Thalamege doncques feut l’assemblée de tous. Là Pantagruel leurs feist une briefve et saincte exhortation toute auctorisée des propous extraictz de la saincte escripture, sus l’argument de naviguation. Laquelle finie feut hault et clair faicte priere à Dieu, oyans et entendens tous les bourgeoys et citadins de Thalasse, qui estoient sus le mole accourruz pour veoir l’embarquement.
Apres l’oraison feut melodieusement chanté le psaulme du sainct roy David, lequel commence. Quand Israel hors d’Aegypte sortit. Le pseaulme parachevé feurent sus le tillac les tables dressées, et viandes promptement apportées. Les Thalassiens qui pareillement avoient le pseaulme susdict chanté, feirent de leurs maisons force vivres et vinage apporter. Tous beurent à eulx. Ils beurent à tous. Ce feut la cause pourquoy personne de l’assemblée oncques par la marine ne rendit sa guorge, et n’eut perturbation d’estomach ne de teste. Au quelz inconvenient ne eussent tant commodement obvié, beuvans par quelques iours paravant de l’eaue marine, ou pure, ou mistionnée avecques le vin, ou usans de chair de Coings, de escorce de Citron, de ius de Grenades aigresdoulces : ou tenens longue diete : ou se couvrans l’estomach de papier : ou autrement faisans ce que les folz medicins ordonnent à ceulx qui montent sus mer.
Leurs beuvettes souvent reiterées, chascun se retira en sa nauf : et en bonne heure feirent voile au vent Grec levant selon lequel le pilot principal nommé Iamet Brayer, avoit designé la routte, et dressé la Calamite de toutes les Boussoles. Car l’advis sien, et de Xénomane aussi feut, veu que l’oracle de la dive Bacbuc estoit pres le Catay en Indie superieure, ne prendre la routte ordinaire des Portugualoys : Les quelz passans la Ceincture ardente, et le cap de Bonasperanza sus la poincte Meridionale d’Africque, oultre l’Aequinoctial, et perdens la veue et guyde de l’aisseuil Septentrional, font navigation enorme. Ains suyvre au plus pres le parallele de ladicte Indie : et gyrer au tour d’icelluy pole par Occident : de maniere que tournoyans soubs Septentrion l’eussent en pareille elevation comme il est au port de Olone, sans plus en approcher, de paour d’entrer et estre retenuz en la mer Glaciale. Et suyvans ce canonique destour par mesme parallele, l’eussent à dextrer vers le Levant, qui au departement leurs estoit à senestre.
Ce que leurs vint à profict incroyable. Car sans naufrage, sans dangier, sans perte de leurs gens, en grande serenité (exceptez un iour pres l’isle des Macræons) feirent le voyage de Indie superieure en moins de quatre moys : lequel à poine feroient les Portugualoys en troys ans, avecques mille fascheries, et dangiers innumerables. Et suys en ceste opinion, sauf meilleur iugement, que telle routte de Fortune feut suyvie par les Indians, qui navigerent en Germanie, et feurent honorablement traictez par le Roy des Suedes, on temps que Q. Metellus Celer estoit proconsul en Gaulle : comme descrivent Cor. Nepos, Pomp. Mela, et Pline apres eulx.